2Pe 2 | GbrGAW | STEP | Ama a anabi akatai ɓei nyi nna nyipyei avun nyace, ngye shi amalami akatai ɓa kun nfye mi nyi. Ɓa ɓei ce akata nʼgbai tu n Shekwoyi tukwo, ɓai pmi avun wu ɓa Dagayi nwo ɓei si ɓa nyi; ama wahala bwi-bwi nya ɓelo tu nɓa jtukwo npye-pyei.

2 Peter 2

Amalami Akatai Nɓa ɓegbednayi

1 Ama a anabi akatai ɓei nyi nna nyipyei avun nyace, ngye shi amalami akatai ɓa kun nfye mi nyi. Ɓa ɓei ce akata nʼgbai tu n Shekwoyi tukwo, ɓai pmi avun wu ɓa Dagayi nwo ɓei si ɓa nyi; ama wahala bwi-bwi nya ɓelo tu nɓa jtukwo npye-pyei. 2 Aza n mwa begye ɓei vi oɓa kata, nge anagbai zhin to zhin ɓenukwoi nun. Ntu ɓa ɓo, aɓei kpe Kristi n wo zokwoi agye. 3 Amalami ye, ntu ɓa shakpe ɓo, ɓa ɓei gna fye ɓeho-ɓehoi ntuge ɓa bwa fye agyiwye. Ama Shekwoyi ɓei laɓa zunkni tunyi n sapa, oɓa bwi-bwi tulo n zokwo. 4 Gama Shekwoyi to ɓei fa amalaika n ɓa ɓei zhin laifi nyin, ama wa sheɓa yafi n anapi, nfi agma fifiyi fi nabmi awyegmanya ɓa pmi wadawyi. 5 To wa fa aza a sapa yim akpe Nuhu, oza n wo ɓei daɓo ga Shekwoyi, n wo puwayi aza ngun tnaba, ama Shekwoyi wa wu anyi vinya n nuwan yakwo yi. 6 Nnavun wa ze Sodom n Gomora azhiyi otnu, wa wun ɓaya nanyi wyeba, wa zeɓa mutu nya na tna?-?Shekwoyi viyi aba n nabye, ɓa pa ɓa wodna.

7 – 8 Ama dna n esa gmanyi Dagayi wa gni Lutu, n Sodom ntuge wo ɓei zhin oza manayi nu, aɓo nukwoi n wo ɓei zhin woi gye laɓa fyegyi-fyegyi nyi, ɓa ɓo zhin ɓai san wo nya. 9 Ntu cenu, Dagayi ɓami wa gni yi n na jaraba n ɓa shegun yi laɓa nyi, wa gyi abye n na aɓo nukwoi tayi har owa da nyipyei-a ɓe. 10 Wo gna minagyi gyi n na zai n ɓa vi ɓa aɓo nukwoi, aɓo pwawo shakpenya, n na zai n ɓa mwa ɓahin ttukwo, ɓai kpe Shekwoyi aza agye ntna edna. 11 Koda-yake amalaika n ɓa zhi n Dagayi abye nyi, ɓa iko yi lo n kala yi ndu a malami a katai ye, ɓata da ɓa ɓenukwoyi n Shekwoyi abam.

12 Ama a malami a katai ye zhin aza mama nu, ɓa wu gmanyi-gmanyi n na nyakpai nu, ɓai zhin aɓo ɓa cei pma; ngye anyakpa nna maɓa a wan ai wu nyi. Ɓa zhin ɓa ma iko wyegma nya esan nɓa ta kpe kwo yem; ai aɓa duɓa ɓoya ɓedo na aljanu yi viyan n iko anapi nyai ɓe.

13 Lada nyi n na malami ye ɓei gwo ntu ɓa laifi ɓo. Ntuge ɓa sase fi nanyi da nukwoi fyegyi-fyegyi, ɓa zhin a vinyikwo nya nu n na aci gusai n fyaba, ɓa dna fye kwoce, ɓai sasefi n na laifi nukwoi n sahoi, har ɓai lofi nfya gmada ye-ye nya ngyeɓa zhin aza manayi. 14 Nyikwoza to lo n ɓa ta shi wo ashakpe wyem, anagbai zhin yi ta kun ɓam, ɓai dna aza kwoce n ɓa to mizhi m, ɓai tu ɓahin mwi ɓa ze ashakpewoyi, aɓi bwi-bwi-yi nu aknituyi. 15 Ɓaku bwi zokwo ɓaku ze ngye Balamu Basura nugun, nwo ɓei kayadna n ye-ye n na gyiwyei, n wo ɓei ye wa bwa dna n ɓenukwoi zhin nyi. 16 Ama aɓo la wo kun ntu wo laifi ɓo, esa nu zhagawyi ɓei daɓo n woi n zanyi-kwoci begye yi, kwa kma anabi ɓenukwoyi-zhin.

17 Aza deye pya to na pma yin ngye adnabminu nɓaku wo, nwu gye a ɓa bwa nyaho-manai nɓa, ama awo, ɓato mizhim ngye ogma gyesa, n ese ku kwo ya nyi. Aku ɓa zunkni lo cei ʼbwo tna ceyi wyegmaanya. 18 Ɓai gma n ɓa laifi yi n gbegyi yi, ɓai zhin apma n nayi shakpe yi, ɓai je aza gnifi n ɓenukwoi zhin n sato mwa shi ɓa pwo cem.

19 Ɓai ci ge, “Ata gnifye ntu ɓemanai zhin ɓo nun, ntu cenu fye ɓa mi fya zhin ɓenukwoi ɓedo, fye zhin ɓo kwo dafye, fye la bugba leya.” Ama a malamiye n ɓa ga fye loloya n owa nyi, n ɓahin tukwo ɓa pa-pai lo n zhin alaifi fyenu, n bwibwi. Ntuge oza zhin enya fyenu nu nkwo woi wan shi. 20 Esanu oza la pwo n aɓenukwoyi anyi nya zokwo, ntu yi Dagayi n Gniyi yi Yesu Kristi yekpe ɓo, wa je lodna n laifi wa ze kwo fyenu njesun, wo zhin wa gna sapa wunya. 21 Kwo ɓei ɓa gna bmiya ngye to wo ye kpe Kristi zokwo yem, afa odo n wo ku kpeye, wa pmi avun wu owa wyidna gyigyi-yi n na ɓei ku gawo nyi. 22 Anyi ɓesi-si kwo-kwoi lo ai cige, “Omui zhin kwa jeze ɓe da okwatu, a fu burutu nuwan kwa jezeɓe kwa nya kma-kma dna na denbi nu.” Kwo wu lonu, n naza ba n ɓa jeze ɓeda ɓa laifi.